Hitastig og fleiri góðir punktar

Bjórinn frá Vífilfelli er gæðabjór sem á skilið að hann sé borinn fram á réttan hátt. Mikilvægt er að glös séu hrein og það er góð regla að skola glösin með köldu vatni áður en bjórnum er hellt og þess skal gætt að um 2-3cm froðulag sé í glasinu þegar það er borið fram.

Heppilegasta hitastigið á bjór til drykkjar er 7-12°C en þá eiga bragðgæði hans að njóta sín best. Víking Lager og Víking Lite eru ljósir bjórar og þá skal bera fram í kaldara lagi, Víking Gylltur nýtur sín best 8-11°C. Kolsýruinnihaldið í bjór er miðað við að hluti kolsýrunnar hverfi þegar bjórnum er hellt í glas. Bjór sem drukkinn er beint úr flösku eða dós inniheldur því meiri kolsýru. Með því að drekka bjórinn úr glasi verður réttum styrk kolsýrunnar náð. Ilmurinn af bjórnum er stór hluti af bragðinu sem þú finnur og því deyfist bragð bjórsins sé hann drukkinn beint úr flösku eða dós, auk þess sem bjórinn er fallegri og meira lystaukandi séður í glasi þar sem gullinn liturinn fær notið sín.

Mælt er með svokölluðum pilsen glösum sem eru há og kúpt. Þar sem þau eru mjó endist froðukollan lengur og í slíkum glösum færðu best notið þess að fylgjast með loftbólunum mynda handahófskennt mynstur sitt í hliðunum og stíga síðan upp glasið. Ferskleiki hefur mikið að segja þegar kemur að bragðgæðum bjórs og almennt má segja að bragðið njóti sín best sé hans neytt innan tveggja til þriggja mánaða frá framleiðsludegi.